L’Agrupación d’Etnografia y Folclor Reija de Llangréu fúndase en 1955 de la mano de “Maite Gutierrez Olay” col nome de “Coros y Danzas de La Felguera”  y camuda’l so nome en 1978 n’homenaxe póstumu a un de los sos componentes, “Jorge Florez Lopez”, conocíu como “Reija”.

Dende un entamu’l so principal esmolecimientu y porgüeyu diríxese a caltener ya esparder el folclor y la etnografía popular en tolos sos aspeutos. D’esi mou non solo representa los bailles y cantares tradicionales d’Asturies, sinón que tamién organiza charres, esposiciones y talleres de tradición, amás de cuntar con escuela música y cultura tradicional.

Nes sos interpretaciones musicales trata de presentar los bailles y dances tradicionales d’un mou asemeyau al que les xentes del pueblu representaben y representen nes romeríes y folixes populares. El so repertoriu abarca la totalidá d’Asturies, pero tien el so principal raigañu na tradición de la cuenca minera del Nalón.

En toos estos años, fueron numberoses les actuaciones feches tanto n’España como n’Europa. Ente elles hai de destacar la so presencia en festivales de Lille (Francia), Viana do Castelo (Portugal), Montpellier (Francia), Æro y Copenhague (Dinamarca), Utrech y Henguelo (Holanda), Serra da Estrela (Portugal), Festival Intercelticu de Guingamp (Bretaña) y numberoses participaciones en festivales de folclor n’España

Cunta colos galardones “Arandanu de Plata” del Certamen de los pueblos d’Asturies de Navelgas en Tinéu y el “Urogallu de Bronce” del Centru Asturianu de Madrid, en reconocimientu pol so llabor d’investigación.

Al día de güei,  l’Agrupación d’Etnografia y Folclor Reija de Llangréu sigue trabayando col mesmu finxu que persigue dende los sos orixenes, el  reconocimientu pola sociedá, de la cultura popular y tradicional, rexistrandola, estudiandola ya espardiendola, faciendo lo que seya menester pa que nesti sieglu qu’entamamos, s’amalgame’l puestu que se merez.