El trabayu con material etnograficu abarca gran parte de les llabores llevaes a cau pola Agrupación. Tres la compilación d’esti material nes estremaes salides de campu, el departamentu d’etnografía restaura, reconstrui y cataloga les pieces que dempués s’usaran nes actividaes.

Les charres y conferencies sobre Etnografía y Folclor completen les xeres de l’Agrupación. Avera estes a entidaes públiques, privaes, colexos y conservatorios de música, contribuyendo asina a esparder la cultura asturiana dientro de los planes d’enseñanza d’estos.

Asina, demientres los caberos 20 años, l’Agrupación fizo baxo’l titulu “Alcordanza”, estremaes espublizaciones, charres, amueses ya esposiciones sobre temes tradicionales, como la vistimienta, instrumentos, alimentacion, ganaderia ya otres.

Si hai daqué qu’identifique a un pueblu, eso ye la so llingua. Al traviés d’ella espresase, camienta ya esparde´l so pensamientu. Dende va cuantayá l’Agrupación da-y puxu al usu del Asturiano nos sos escritos, espublizaciones y otres xeres. D’esti mou trata d’esparder l’Asturiano y algamar el so respetu dientro y fuera d’Asturies.